દુનિયામાં એવી ઘણી જગ્યાઓ છે, જે રહસ્યો અને માન્યતાઓથી ઘેરાયેલી છે. આ માન્યતાઓ એટલી મજબૂત છે કે તેમને ટાળવું અશક્ય છે. આ માન્યતાઓને કારણે તે લોકોમાં આકર્ષણનું કેન્દ્ર રહે છે. આવો જ એક ટાપુ જાપાનમાં છે, જેનું નામ ઓકિનોશિમા છે. આ આઈલેન્ડ પર જવા માટે ખૂબ જ કડક નિયમોનું પાલન કરવું પડે છે, સાથે જ અહીં મહિલાઓ પણ જઈ શકતી નથી.
આવો જાણીએ, જાપાનના રહસ્યમય દ્વીપ ઓકિનોશિમાના કયા કડક નિયમો છે અને શા માટે મહિલાઓને ત્યાં જવાની મનાઈ છે?
યુનેસ્કો દ્વારા વર્લ્ડ હેરિટેજમાં સામેલ ફુકુઓકાના મુનાકાતા કિનારે આવેલ ઓકિનોશિમા આઇલેન્ડ 700 ચોરસ મીટરમાં ફેલાયેલો છે. ચોથી સદીથી નવમી સદી સુધી, તે કોરિયન દ્વીપકલ્પ અને ચીન વચ્ચે વેપારનું કેન્દ્ર હતું. આ ટાપુ પર મુનાકાતા તૈશા ઓકિત્સુ મંદિર છે, જેમાં શિંટો દેવતાની પૂજા કરવામાં આવે છે. 17મી સદી દરમિયાન અહીં જહાજોની સુરક્ષા માટે પૂજા કરવામાં આવતી હતી. શિન્ટો એ જાપાની મૂળ ધરાવતો પ્રાચીન ધર્મ છે.
સામાન્ય રીતે એવું માનવામાં આવે છે કે સ્ત્રીઓના પ્રવેશ પર પ્રતિબંધ શિન્ટો માન્યતાઓને કારણે હોઈ શકે છે, જે સ્ત્રીઓના માસિક ધર્મને અશુદ્ધ માને છે. વર્ષમાં એકવાર યોજાતા તહેવારમાં મહિલાઓ ઉપરાંત અન્ય લોકો પણ પ્રવેશ મેળવે છે.
આ સમય દરમિયાન, ફક્ત 200 પુરુષોને પ્રવેશવાની મંજૂરી છે. એવું માનવામાં આવે છે કે ઉત્સવ દરમિયાન થનારા શુદ્ધિકરણ સમારોહમાં, બધા પુરુષો તેમના સંપૂર્ણ કપડાં ઉતારે છે અને સમુદ્રમાં નગ્ન સ્નાન કરે છે, જે તેમના આત્માને શુદ્ધ કરે છે.
જાપાનના બે સૌથી જૂના ઐતિહાસિક ગ્રંથો કોજીકી અને નિહોન શોકીમાં ઓકિનોશિમાનો ઉલ્લેખ છે.કોજીકી અનુસાર, સૂર્યદેવી અમાટેરાસુએ તલવારમાંથી ત્રણ પુત્રીઓ બનાવી અને તેમને જાપાન મોકલ્યા, જ્યાં મુનાકાતા કુળ દ્વારા તેમની પૂજા કરવામાં આવી.
અહીંના લોકો મુંકતા તૈશાના ત્રણ મંદિરોમાં આજે પણ આ દેવતાઓની પૂજા કરે છે. દરિયાઈ સફરમાં કોઈ અવરોધ ન આવે તે માટે આ પૂજા કરવામાં આવે છે.
ધાર્મિક કારણોસર મહિલાઓના પ્રવેશ પર પ્રતિબંધ મુકવામાં આવ્યો છે. એટલું જ નહીં મહિલાઓ સિવાય અહીં આવનાર દરેક વ્યક્તિએ કડક નિયમોનું પાલન કરવું પડે છે. તે નિયમો છે:
ત્યાંથી તમારી સાથે કંઈ લાવશો નહીં.
તમારા પ્રવાસ વિશે કોઈને કહો નહીં.
આ ટાપુ પરથી ઘાસ લાવવાની સખત મનાઈ છે.
તમને જણાવી દઈએ કે, તહેવાર સિવાયના દિવસોમાં ફક્ત પૂજારી, સંશોધકો, સૈન્ય કર્મચારીઓ અને પત્રકારોને જ ટાપુમાં પ્રવેશવાની મંજૂરી છે.
