ભારતના ભૂતપૂર્વ ઝડપી બોલર એસ શ્રીસંત 7 વર્ષ બાદ ઘરેલું ક્રિકેટમાં વાપસી કરશે. આવતા મહિને યોજાનારી સૈયદ મુસ્તાક અલી ટી 20 ટૂર્નામેન્ટ માટે તેમને કેરળની ટીમમાં સામેલ કરવામાં આવ્યા છે. શ્રીસંત પર મેચ ફિક્સિંગ માટે સાત વર્ષ માટે પ્રતિબંધ હતો.
શ્રીસંતને આઈપીએલમાં સ્પોટ ફિક્સિંગમાં સામેલ કરવા બદલ બીસીસીઆઈ દ્વારા પ્રતિબંધ મૂક્યો હતો. કેરળ ક્રિકેટ એસોસિએશન દ્વારા જાહેર કરાયેલ કેરળ ટીમના ખેલાડીઓના લિસ્ટમાં તેનો સમાવેશ કરવામાં આવ્યો છે. કેરળની ટીમ 10 જાન્યુઆરીથી મુંબઇમાં રમશે. શ્રીસંતનો સાત વર્ષનો પ્રતિબંધ સપ્ટેમ્બરમાં સમાપ્ત થયો હતો અને તે પછી તેની આ પ્રથમ સ્થાનિક ટૂર્નામેન્ટ હશે. આ મહિનાની શરૂઆતમાં તેમને અલાપ્પુઝામાં સ્થાનિક ટી 20 ટૂર્નામેન્ટના ખેલાડીઓના લિસ્ટમાં શામેલ કરવામાં આવ્યો હતો, પરંતુ કોરોના વાયરસને કારણે સરકાર દ્વારા ટૂર્નામેન્ટને મંજૂરી આપવામાં આવી ન હતી. આ કારણે ટૂર્નામેન્ટ મુલતવી રાખવામાં આવી હતી.
કેરળ ક્રિકેટ એસોસિએશનના એક અધિકારીએ જણાવ્યું છે કે સૈયદ મુસ્તાક અલી ટી -20 ટૂર્નામેન્ટમાં કેરળની ટીમનું નેતૃત્વ સંજુ સેમસન કરશે, જ્યારે સચિન બેબી ટીમનો વાઇસ કેપ્ટન રહેશે. શ્રીસંત, સંજુ સેમસન અને સચિન બેબી સિવાય ટીમમાં બેસિલ થાંપી, જલાજ સક્સેના, રોબિન ઉથપ્પા, વિષ્ણુ વિનોદ, સલમાન નિઝર, નિદેશ એમડી અને આસિફ કેએમ પણ છે. કેરળની ટીમમાં સામેલ થયા બાદ તેમણે ટ્વીટ કરીને ખુશી વ્યક્ત કરી હતી.
તમને જણાવી દઈએ કે, ભારતીય ઝડપી બોલર એસ શ્રીસંતને 2013માં આઈપીએલમાં ફિક્સિંગ કરવા બદલ દોષી ઠેરવવામાં આવ્યો હતો, ત્યારબાદ બીસીસીઆઈએ તેમના પર આજીવન પ્રતિબંધ મૂક્યો હતો, પરંતુ બાદમાં કોર્ટે તેને ઘટાડીને 7 વર્ષ કરી દેવામાં આવ્યો હતો અને તેના પર જે પ્રતિબંધ મૂકવામાં આવ્યો હતો તે 2020 સપ્ટેમ્બરમાં સમાપ્ત થયો. શ્રીસંતે કહ્યું છે કે હવે તેનું લક્ષ્ય ફરી એક વખત આઈપીએલ રમવાનું છે, સાથે સાથે દેશનું પ્રતિનિધિત્વ કરવાની સાથે, તે 2023 વનડે વર્લ્ડ કપમાં રમવા માંગે છે. તે જોવાનું રહ્યું કે-37 વર્ષિય શ્રીસંત પોતાના પ્રદર્શન દ્વારા આઈપીએલમાં જગ્યા બનાવી શકે છે કે નહીં અને તે ટીમ ઈન્ડિયાના પસંદગીકારોને કેટલી હદે પ્રભાવિત કરી શકે છે.
